Членовите од Новинарскиот клуб „Јоска“ при СОУ „Јосиф Јосифовски“ од Гевгелија заедно со ученици од основните училишта од општина Гевгелија беа во посета на Медиумската информативна агенција (МИА) и националната телевизија ТВ 21. Целта на посетата беше учениците да се запознаат со подготовката на веста, од нејзиното создавање до нејзиното праќање во етерот – до читателите и гледачите. Меѓу другото учениците се запознаа и со техничкиот начин на подготовка на вест, дневно-информативни емисии и други медиумски производи.
За предавањето во Медиумската информативна агенција беа задолжени директорот на агенцијата Драган Антоновски и уредникот Билјана Анастасова – Костиќ. Во пријатна атмосфера и со практични вежби учениците имаа можност на лице место да видат како се создава новинарскиот продукт, но и да поразговараат со новинарите и начинот на нивното работење.
Во националната ТВ 21, заменикот главен и одговорен уредник Един Растодер им објасни на учениците како се снимаат дневните информативни емисии, но учениците и сами се обидоа да застанат пред камерите и да ја почуваствуваат магијата на телевизискиот медиум.
Посетата беше во рамките на проектот „Јас=Медиум“ на ЗГ „Од станица до граница“ од Гевгелија.
