Младинскиот образовен форум (МОФ) и Македонскиот институт за медиуми (МИМ) објавија повик за основање новинарски клубови (секции) во основните и во средните училишта од државава. Новинарските клубови се реализираат во рамки на проектот на УСАИД за медиумска писменост „Младите размислуваат“.
Новинарските клубови треба да вклучуваат едукативни и практични активности кои ќе се одвиваат во рамки на воннаставните активности.
СОУ „Јосиф Јосифовски“ со Клуб „Јоска“ од Гевгелија во конкуренција од сите основни и средни училишта од Македонија е избран како еден од десетте најдобри апликанти под раководство на професорот Тони Аврамов.
Учениците ќе имаат можност да предлагаат и да обработуваат теми коишто се поврзани со образовниот процес и училишните активности, но и со културни, забавни, спортски или други теми кои се од интерес на младите.
Програмата на клубовите ќе ги опфати следните теми:
- Новинарството како професија – што значи да се биде новинар (улогата на новинарството, новинарски стандарди, уредувачка политика);
- Новинарски жанрови (вест, извештај, интервју);
- Медиумска писменост (концепт, елементи, вештини);
- Дезинформации, погрешни информации и штетни информации;
- Проверка на информациите и фото-форензика;
- Нови медиуми;
- Креирање медиумски содржини за различни медиумски платформи.
На крајот на училишната година ќе биде објавен конкурс за најдобар медиумски производ подготвен од страна на новинарските клубови од основните и од средните училишта.
„Младите размислуваат“ е проект на УСАИД го спроведува американската организација ИРЕКС со своја локална канцеларија во Скопје, во партнерство со Македонскиот институт за медиуми (МИМ), Министерството за образование и наука (МОН) и Бирото за развој на образованието (БРО).