Со особена гордост и задоволство ве информираме дека СОУ „Јосиф Јосифовски“ – Гевгелија успешно го претстави училиштето на Националниот натпревар на вештини 2026, кој се одржа во СУГС „Партенија Зографски“ – Скопје, додека свеченото доделување на наградите се реализираше во АСУЦ „Боро Петрушевски“ – Скопје.
Настанот беше организиран од Занаетчиска комора Скопје со поддршка на Европската Унија и институциите од областа на стручното образование, а на истиот учествуваа 64 ученици од средните стручни училишта од целата држава, натпреварувајќи се во 15 различни стручни дисциплини.
Во организацијата и реализацијата на натпреварот беа вклучени повеќе средни стручни училишта од Скопје:
СУГС „Лазар Танев“, СУГС „Партенија Зографски“
АСУЦ „Боро Петрушевски“ и СУГС „8 Септември“
Нашето училиште учествуваше во дисциплината „Дигитален маркетинг и е-трговија“, каде ученичката Кристина Самарџиева, ученичка во IV година од економската струка, покажа извонредна креативност, иновативност и професионален пристап.
Во рамки на натпреварувачката задача, Кристина изработи комплетна дигитална маркетинг кампања, која опфаќаше:
- креирање маркетинг стратегија,
- анализа на пазар и целна група,
- планирање промоција преку социјални медиуми,
- изработка на визуелни и промотивни содржини,
- примена на елементи од е-трговија,
- и професионална презентација пред стручна комисија.
Со својот сигурен настап, креативни идеи и одлична презентација, Кристина во силна конкуренција освои одлично 4 место на државно ниво.
Натпреварот се одвиваше во професионална и динамична атмосфера, преку практични задачи, презентации и демонстрации на реални вештини, а учениците имаа можност да ги покажат своите способности пред стручни комисии, компании и претставници од образовниот сектор. Во рамки на настанот беа организирани и изложбени штандови, презентации и активности за промоција на стручното образование и дуалниот модел на учење.
Ментор на ученичката беше професорката Снежана Кичукова, која со својата посветеност и поддршка придонесе за успешното претставување на училиштето на овој значаен национален натпревар.
Овој успех претставува уште една потврда за квалитетната работа, трудот и континуираниот развој на учениците и наставниот кадар во СОУ „Јосиф Јосифовски“ – Гевгелија.
