Во текот на април и мај, во СОУ „Јосиф Јосифовски“ се одржаа низа возбудливи и неизвесни меѓукласни натпревари во одбојка. Турнирот привлече големо внимание кај учениците, а во спортската сала владееше вистинска натпреварувачка атмосфера. На турнирот учествуваа повеќе од 15 екипи составени од ученици од втора и трета година, кои со голема борбеност и тимски дух се натпреваруваа за титулата училиштен шампион.
Натпреварите беа исполнети со многу атрактивни поени, силни сервиси и неизвесни сетови, а секоја екипа даде максимум за да обезбеди место во завршницата. По бројни возбудливи дуели, до финалето успеаја да стигнат класовите II¹ и III⁷, кои покажаа најдобра игра во текот на целиот турнир.
Финалниот натпревар донесе одлична атмосфера и голема поддршка од публиката. По одлична игра и сигурен настап, екипата на III⁷ успеа да победи со резултат 2-0 во сетови и заслужено ја освои титулата училиштен шампион.