УЦ "Јосиф Јосифовски"

ПЕДЕСЕТГОДИШЕН РАСТЕЖ

Во Гевгелија неполната (нижа) гимназија „Јосиф Јосифовски“ со решение на Советот за просвета, наука и култура при Владата на НР Македонија, на 7 јули 1952 година прерасна во Полна (осумкласна) гимназија. Оваа одлука народот од Гевгелија и гевгелискиот крај ја прифати со огромно воодушевување и радост. Првпат во културно - образовната историја градот Гевгелија се здоби со ваква значајна институција. Со невиден ентузијазам, во рекорден рок од неполни четири месеца, со доброволни акции и материјални прилози од ученици, наставници и граѓани изградена е новата гимназиска зграда во близината на Железничката станица. Новоизградената гимназија во присуство на голем број граѓани свечено е предадена во употреба на 28 септември 1952 година со трети, петти и еден шести клас.
Во учебната 1956-57 година дојде до трансформација на школскиот систем во Републиката. Нашето училиште од Полна, стана Виша гимназија „Јосиф Јосифовски“, задржувајќи ги горните четири класа, а нижите се приклучија кон Основното училиште „Владо Кантарџиев“.
Гимназијата престана да работи во учебната 1959-60 година само една година, а се оформи Економско училиште, кое работеше до 1970-71 година.Гимназијата повторно се отвори во учебната 1960-61 година и оттогаш работи сè до денес.
На 1.01. 1976 година со интегрирањето на Гимназијата со Металското училиште „Ристо Поп - Ристов“, формиран е Училишниот центар за средно образование „Јосиф Јосифовски“ со 19 гимназиски паралелки и 6 паралелки металска насока.Подоцна за потребите на гевгелиското стопанство и за развојот на регионот беа отворени и нови насоки.Во учебната 1977-78 година беше отворена електро насоката, а во учебната 1978-79 година угостителско-туристичката насока.Во училишниот центар беа застапени повеќе образовни профили и тоа: металостругари, бравари, машинобравари, радиотелевизиски механичари, електроинсталатери, готвачи и келнери, профили од III степен и IV степен машински техничари и електротехничари за слаба и силна струја. Од учебната 1982-83 година Гимназијата се трансформира според новиот концепт во Биотехничка и Културолошка гимназија.Повторно се воведе економската струка, па така во заедничките образовни основи во I и II година се реализирани 8 изборни програми, а во III и IV година - 6 струки.Во рамките на овие струки беа застапени 8 образовни профили од III степен и 6 образовни профили од IV степен.

Прва плата на вработените во УЦ „Јосиг Јосифовски“

Во 1989 година во средното образование во Македонија се воведе нова реформа. Според овој преобразен концепт, средното образование се трансформира во гимназиски струки и стручни училишта. Во Училишниот центар беа воведени следните струки: природно-математички техничар и информатички техничар, а беа задржани културолошката, машинската и угостителско-туристичката струка. Во угостителско-туристичката струка, покрај постојните образовни профили од III степен (готвач и келнер) се воведе и нов образовен профил од IV степен - хотелско-туристички техничар.
Со новиот образовен концепт се укинаа економската и електро струката.

Гимназиските струки претрпеа нова трансформација: учениците од природно-математичката струка се определија за природно-математичка гимназија, а учениците од културолошката струка за општа гимназија. На тој начин Училишниот центар ја имаше следната структура: природно-математичка и општа гимназија, машинска и угостителско-туристичка струка.
Во учебната 1992 година за првпат беше воведен приемен испит за запишување на учениците, така што 420 ученика во I клас се запишаа со претходно положен приемен испит.
Од 1991 година за учениците од завршните години е воведен завршен испит, а за Гимназијата-матурска, која беше укината со воведувањето на насоченото образование.
Од 2001-2002 година гимназиското образование доживеа нови реформи со воведување изборни подрачја: хуманистичко-општествено и природни науки и математика, а се планира и полагање европска матура која ќе овозможи вклучување на учениците на сите факултети, без полагање приемни испити.

Прво училишно табло