Училишната зграда во изградба

Средното општинско училиште „Јосиф Јосифовски“ е лоциран на ул. „Македонија“ бр.2 во центарот на Гевгелија и се простира на површина во делот под згради на 6.582 m². Центарот располага со дворна површина од 13.000 m², отворено игралиште за мал фудбал и кошарка со површина од 1.800 m².

Училиштето располага со ресторан кој служи за изведување на професионална пракса на учениците од угостителската струка, но и за одржување на веселби, семинари, коктели и слично.
За потребите на машинската струка постојат неколку работилници исто така за изведување на професионална пракса.

Во сите изминати години на своето постоење, училиштето книжниот фонд го збогатувал со стручна литература која е сместена и класифицирана во училишната библиотека, која денес располага со 10.012 книги.

Гимназиско образование

Во 1976 година во Гевгелија во средното училиште се формирани гимназиски паралелки. Потребата од оспособување и образување на учениците за општообразовни е задржана до денес.
Целите на гимназиското образование се огледаат во развивањето на индивидуалните и интелектуалните способности на учениците, како и развивање на хуманистичките, моралните, естетските и граѓанските вредности на личноста.
Гимназиското образование овозможува подемократски пристап во презентирањето на идеите и креативниот дух на учениците, посебно во изнаоѓањето начин како полесно да им се пристапи на животните предизвици.
Целите на гимназиското образование се конкретизираат во усвојувањето на знаењата и развивањето на способностите кои им се потребни на учениците за продолжување на своето школување на високото образование како и развивањето на научниот поглед кон светот.