почеток

Гевгелија

 

 

Гевгелија  се наоѓа на најјужниот дел во Република Македонија и се простира на површина од 317 км2 со околу 20.000 жители. Денес, Гевгелија е современа општина која будно ги прати европските трендови на живеење.
Гевгеличани се горди на местоположбата на својот град. Оддалечени само на неколку километри од границата со Република Грција, тие секогаш се добронамерни во пречекот на различните култури и навики. Оригиналноста можеби и поради тоа е основниот белег на секој жител.
Спојот на медитеранската и континентална клима во Гевгелија условуваат топли денови во текот на цела година. Многу посетители се воодушевуваат од податокот што ја става Гевгелија меѓу првите градови на Балканот со 240 сончеви денови во годината.

 

 

 

 

 

 

 

Гевгелија за градска населба е прогласена во 1886 година, но нејзините корени од досегашното истражување укажуваат на постоење и развиток на култури кои се негувале во текот на милениумите. Археолошките ископувања на локалитетите “Сува Река“, “Парагон“, “Милци“ и “Вардарски Рид“, како и во делови на градот укажуваат дека на ова подрачје живеел народ кој негувал своја автохтона материјална и духовна култура.

 

 

 

 

 

 

 

Својот темпераментен дух, гевгеличани низ годините на развојот,  креативно го надополнуваат со постоењето на неколку традиционални културно-уметнички манифестации: Фестивал на детска песна “Калинка“, Поетско-музичка манифестација “За тебе љубов моја“, Ликовна колонија “Дојрана“, Ден на шегата “Априлијада“, Коледарски хепенинг и други. Во овие манифестации како дел од учесниците редовно се јавуваат ученици од училишниот центар “Јосиф Јосифовски“.

 

 

 

Стандарниот јазик на којшто зборуваат гевгеличани е македонски, но тие својата брзозборливост исто така ја искажуваат преку живиот долновардарски дијалект.