Оној кој ја запознава божицата Талија станува нејзин пленик. Оној кој зачекорува на “штиците што живот значат“ ја вкусува магијата на театарската сцена. И оној кој се вовлекува во рувото на Скомрахите се обврзува да биде месија на Шекспир и Молиер, Чехов, Чернодрински и Стефановски ... месија на Зборот.
        Драмската секција “Дон Кихот“ при УЦ “Јосиф Јосифовски“ активно работи од 1995 година под раководство на професорката по македонски јазик и литература Даниела Џишева. Членовите на оваа секција подготвуваат театарски претстави, учествуваат на разни културни манифестации (поетско-музички вечери, промоции на книги, видео проекти и слично). Драмската група учествуваше двапати на “Дојрански ракувања“, а во 1999 година гостуваше во Охрид со претставата “Чернодрински се враќа дома“ од Горан Стефановски.
        Драмската група е место каде младите се дружат, се забавуваат, ги прошируваат своите знаења од областа на драмската уметност и литература. Вложувајќи ја својата енергија, желба и умешност, тие создаваат нови светови, го покоруваат времето, го освојуваат просторот.
        Да се биде дел од драмската група значи да се споделува Сонот.

“Ние сме од таков материјал
од кој и сништата се правени
и нашите мали животи
се заокружени со сон“
                                                (Протеро во Шекспировата “Бура“) 

Според Пирандело: “Уметноста се свети на животот. Во уметничката креација човекот станува бог“. Нема поголема наслада за душата од моментот кога “малите богови“ танцуваат на сцена, кога оној здивен сјај во очите Ве кани да бидете и Вие дел од тоа чудесно Откровение.

Драмската група ги реализираше театарските претстави:

1996 Театарска претстава „ВИКАЈ МЕ И ГРНЕ САМО НЕМОЈ ДА МЕ СКРШИШ“
1996 Театарска претстава „DΙJΐ VU“ (текст: Ристо Карајков)
1996 Театарска претстава „BABYSSITER“ (текст: Даниела Џишева)
1997 Театарска претстава „САРАЕВО“ (текст: Горан Стефановски)
1998 „ВРЕМЕ ЗА ПТИЦИ“ (стихови од Славица Петреска)
1998 Театарска претстава „ЧЕРНОДРИНСКИ СЕ ВРАЌА ДОМА“ (текст: Горан Стефановски)
1999 Театарска претстава „ДОМА“ (текст: Људмила Разумовскаја)
2000 Театарска претстава „АДСКА МАШИНА“ (текст: Венко Андоновски)
2000 Сцени од драмата „БУНТ ВО ДОМОТ ЗА СТАРЦИ“ (текст: Венко Андоновски)
2004 Театарска претстава „КРОЈАЧ ЗА ДАМИ“ (текст: Жорж Фејдо)

Новогодишни претстави за деца:
1996 „ШТО АКО ИМА ВЕЈАВИЦА ПА ДЕДО МРАЗ ДОБИЕ КИВАВИЦА“ (текст: Афродита Кирјаковска)
1997 „ЕНГЕЛЕ БЕНГЕЛЕ НЕКОЈ ЧУКА ДЕДО МРАЗ ВЕЌЕ Е ТУКА“ (текст: Тони Аврамов)
1998 „ДАЈТЕ МУ ПРАВО НА ГЛАС НА ЗАРОБЕНИОТ ДЕДО МРАЗ“ (текст: Тони Аврамов)
2003 „ЕНГЕЛЕ БЕНГЕЛЕ“ (текст: Тони Аврамов)